TRIGGER WARNING: Bullying, Cyber Violence, Death, Suicide, Depression, Teenage Pregnancy, Anxiety, Stress, Mental Health Disorder, and Physical, Sexual and Emotional Abuse.

    Noong Agosto 12, ipinagdiwang ang International Youth Day. Ito ay naglalayong pukawin ang atensyon ng pandaigdigang pamayanan patungkol sa iba’t ibang suliranin na kinahaharap ng mga kabataan sa kani-kanilang komunidad. Bukod pa rito, ito ay nagsisilbing paraan upang gunitain ang kakayahan at aktibong partisipasyon ng mga kabataan sa lipunan.

            Ngayong taon, ang International Youth Day na may temang “Transforming Food Systems: Youth Innovation for Human and Planetary Health”, ay naglalayong ipakita at ipagmalaki ang pagkamit ng katagumpayan laban sa mga pandaigdigan at lokal na suliranin sa pamamagitan ng kakayahan at aktibong partisipasyon ng mga kabataan.

            Sa paggunita ng Philippine International Youth Day 2021, narito ang iilang mga suliraning madalas hinaharap ng mga kabataang Pilipino:

 

            1. Bullying o Pambu-bully.

 

Ito ang karaniwang pangunahing suliranin na hinaharap ng mga kabataan lalo na ang mga estudyante sapagkat madalas itong nangyayari sa loob ng eskwelahan. Sa katunayan, ayon sa isinagawang survey ng Program for International Student Assessment noong taong 2018, anim sa bawat sampung kabataang Pilipino ang naitalang naging biktima ng bullying. Kaugnay nito, nasa 65 porsyento ng mahigit pitonglibong kabataang Pilipino ang nasa edad kinse anyos na nagsasabing naranasan nilang ma-bully. Iisa lamang ang pinapakita ng mga datos na nabanggit – bago pa man magkaroon ng pandemya talamak na ang karanasan sa pagitan ng mga kabataan o estudyante.

           

            Ang bullying ay hindi lamang sa loob ng eskwelahan nangyayari sapagkat maging ang social media ay naging instrumento na rin ng ibang mga kabataan para makapanakit ng damdamin at makasira ng reputasyon. Sa pinakabagong datos na inilabas ng Statista at UNICEF, halos kalahati sa bilang ng mga kabataang nasa edad 13 hanggang 17 ay nakararanas ng cyber violence o iyong bullying na nagaganap online gamit ang social media.

            Ang bullying ay may malaking epekto sa pisikal at emosyonal na kalagayan ng isang inndibidwal. Nag-iiwan ito ng psychological scar sa mga naging biktima nito na siyang maaaring maging dahilan ng pagpapakamatay. Sa katunayan, ayon sa datos na inilabas ng Philippine Statistics Authority, 3,529 na bilang ng mga namatay sa taong 2020 ay dahil sa pagpapatiwakal. Isa sa mga nakikitang dahilan ng mabilis na pagtaas ng kaso ng pagpapatiwakal ay ang depression na madalas nakukuha dahil sa bullying.

 

            2. Teenage Pregnancy o maagang pagbubuntis.

 

Nito lamang ika-25 ng Hunyo, pinirmahan ng Pangulo ang Executive Order 141 na naglalayong gawing prayoridad ng bansa ang suliranin pagdating sa teenage pregnancy. Tinutulak rin ng Presidente ang Government’s Human Development and Poverty Reduction Cabinet Cluster upang magplano at magpatupad ng mga maaaring solusyon sa suliranin gaya ng comprehensive sexual education, employment opportunities, at health promotion.

 

Ayon sa Philippine Statistics Authority noong 2019, mas lumala pa ang kaso ng mga menor de edad na maagang nanganganak. Sa dating 65,341 na bilang noong taong 2018, ngayon ay nasa 62, 510 na. Samantala, base naman sa survey na inilabas ng Social Weather Stations noong nakaraang taon (2020) ang teenage pregnancy ay ang pinakamahalagang problema ng mga kababaihan ngayon sa bansa.

 

Bukod sa pinirmahang Executive Order ng pangulo bilang tugon, sa mabilis na pagtaas ng bilang ng mga kabataang maagang nagsisipagbuntis, isinusulong rin ng gobyerno na gawing “adolescent-friendly” ang mga health facilities sa bansa

 

 

            3. Mga isyu pagdating sa Mental Health.

 

            Enero pa lamang nang magsimulang pumutok ang pandemya noong taong 2020, subalit nasa tatlong libong pilipino na agad ang lumapit sa mga kinauukulan para humingi ng tulong patungkol sa kanilang mental health issues. Ayon sa National Center for Mental Health, nasa 3,006 na indibidwal na ang binigyan nila ng tulong online dahil sa nararanasang anxiety, depression, stressful life events at mood concerns.

 

Subalit bago pa man magkaroon ng pandemya, mataas na ang kaso ng mga kabataang nakararanas ng problema pagdating sa kanilang mental health. Ayon sa World Health Organization, tinatantyang nasa 10 hanggang 20 porsyento ng mga kabataan ang biktima ng mental health disorder. Dagdag pa rito ang pinakabagong datos ng PSA sa taong 2020 kung saang 57% ang itinaas sa mga kaso ng pagpapakamatay o pagpapatiwakal kumpara sa mga naunang taon.


4. Pisikal at sekswal na pang-aabuso.


Kababaihan ang mga madalas na biktima ng pisikal at sekswal na pang-aabuso sa Pilipinas. Ayon sa inilabas na survery ng National Demographic and Health Survey noong taong 2017, isa sa bawat apat na kababaihang nasa edad 15-49 ang nakararanas ng pisikal, emosyonal at sekswal na pang-aabuso ng kanilang mga asawa o kasama.

Base sa Republic Act 9262 o ang Anti-Violence Against Women and their Children Act of 2004, ang anumang uri ng pang-aabuso sa kababaihan ay haharap sa matinding kaparusahan.

Ganunpaman, laganap pa rin ang ganitong klaseng krimen lalo na sa mga kabataan. Sa kasalukuyan, taliwas sa kung ano anginaakala ng lahat, ang tahanan ay hindi masasabing “safe sanctuary” ng mga bata at kabataan sa panahon ng pandemya, ito’y nakabase rin sa isang artikulo na inilabas ng Philippine Daily Inquirer.


REFERENCES:

 Researcher: Amy Ruth B. Velnzuela

Layout Artists: Britney Cabia and Neil Cabaces